ཀུ་ཤུ་ཁ་པར་བདག་གི་གྲོགས།
22/07/2014 18:03 ཀུ་ཤུ་ཁ་པར་བདག་གི་གྲོགས།
འབའ་སྲས།
ལག་ཏུ་བཟུང་ན་བདེ་ཞིང་ཡང་མོ་ཞིག །
བྱ་བ་སྒྲུབ་ན་མྱུར་ཞིང་སྟབས་བདེ་བོ།།
དེ་རིང་ཅི་བྱུང་མྱུར་དུ་སྟོན་བྱེད་པ།།
ཀུ་ཤུའི་རྟགས་ཅན་ཁ་པར་བདག་གི་གྲོགས།།
སུ་དང་གང་གིས་མ་མཐོང་མི་ཤེས་པ།།
མཐའ་ཡས་འཇིག་རྟེན་ཀུན་ལ་མཆིས་པ་དག །
ཨེ་མ་ཀུ་ཤུ་རྟགས་ཅན་ཁ་པར་འདིས།།
ཁྲ་ཆུང་མིག་གི་དབང་བོར་ཅི་ཡང་སྟོན།།
རྒྱང་རིང་ཡུལ་གྱི་མཛའ་མོའི་ཞལ་རས་དང་།།
འགྲམ་དུ་བསླེབས་པའི་དགྲ་ཡི་ངོ་གདོང་སོགས།།
སྐད་ཅིག་དེ་ཉིད་སྟོན་པའི་ཁ་པར་འདི།།
ལྷ་བ་མོ་བ་དག་གིས་མཚོན་ནུས་མིན།།
ཐག་རིང་སྙིང་སྡུག་ངག་གི་མཛའ་གླུ་དང་།།
ངོ་མི་ཤེས་པའི་ཆ་མེད་མི་དག་གིས།།
རང་རང་ས་ནས་དབྱངས་ལ་གྱེར་བའི་གཞས།།
ཐོས་འཛིན་སྒོ་མོའི་ཁ་ལ་ཉེ་བར་བསྐྱེལ།།
སྙན་ངག་པ་ཡི་སོར་མོ་འཁྱུག་ས་དང་།།
གཞས་པ་རྣམས་ཀྱིས་པི་ཝང་བརྡུངས་སའི་ཡུལ།།
ཁོམ་ཡོད་དག་གིས་སྟོང་བཤད་རྒྱག་ས་ཡང་།།
ཀུ་ཤུ་ཁ་པར་འདི་ལས་གཞན་དུ་མིན།།
ཁོ་ཡིས་སྙན་ངག་གྲོང་ཁྱེར་འདི་ལས་བཞེངས།།
གྱི་ལིང་རྟ་ཡི་འཚེར་སྐད་འདི་ལས་བསྒྲགས།།
སྒོ་འགྲམ་གསང་བའི་ལམ་ཁ་འདི་ལས་བཟོས།།
ཡིག་འབྲུ་འབུམ་གསུམ་ཁྲི་བདུན་འདི་ལས་བྲིས།།
རྟ་བདུན་དབང་བོའི་ཤིང་རྟ་འདྲེན་རོགས་དང་།།
རི་བོང་འཛིན་པའི་དཀྱིལ་འཁོར་རྒྱས་པའི་གྲོགས།།
ཀུ་ཤུ་རྟགས་ཅན་ཁ་པར་འདི་ལས་གཞན།།
བདག་ལ་མེད་དོ་དེ་བས་བདག་གི་གྲོགས།།
༢༥/༡༠/༡༣ གློ་བུར་དུ།
Sent from my iPhone
———
Backཞར་བཀོད་ལེ་ཚན།
———
———
འབྲེལ་གཏུག
ངོ་དེབ། ཁ་སྒང་བསམ་གཏན།
གནམ་ཐིག འབའ་སྲས།
ཁ་པར། ༠༠༣༣༧༨༦༤༡༢༤༢༤
>>
———
———
གཞས་ར་ཁྲ་མོ།
སེམས་ཀྱི་རེ་སྨོན།
ངའི་བླ་མའི་དགུང་ལོ་ཇེ་བགྲེས་རེད།།
ང་བླ་མ་དད་པ་ཇེ་ཆེ་རེད།།
ངའི་རྩ་བའི་བླ་མ་ཐུགས་རྗེ་ཅན།།
སྐུ་ཡུན་རིང་བཞུགས་པའི་སྨོན་ལམ་འདེབས།།
ངའི་མ་ལོའི་སྐྲ་ལོ་ཇེ་དཀར་རེད།།
ང་མ་ལོར་དུངས་བ་ཇེ་ཆེ་རེད།།
ངའི་དྲིན་ཆེན་མ་ལོ་བཀའ་དྲིན་ཅན།།
སྐུ་ཡུན་རིང་བཞུ
>>
———