ང་དང་ཁྱོད་ཀྱི་ལམ།

 ནམ་མཁའི་སྤྲིན་པ་ལོང་ལོང་དཀྲིགས་པའི་འོག ། 

ས་ཡི་མེ་ཏོག་འདབ་མ་དགོད་པའི་སྟེང་།། 
ང་དང་ཁྱོད་ཅེས་དབྱེ་བའི་མི་ཡི་བར།། 
ཉེ་རིང་སོ་སོར་བགྲོད་པའི་ལམ་ཞིག་མཆིས།། 

ཁྱོད་ཀྱི་ལམ་ནི་རྒྱུ་དང་འབྱོར་བའི་ལམ།། 
བདག་གི་ལམ་ནི་དཀའ་སྡུག་ཁྲག་གི་ལམ།། 
ཁྱོད་ཀྱི་ལམ་ནི་ཅི་འདྲའི་བདེ་ཞིང་འཇམ།། 
བདག་གི་ལམ་ནི་ཅི་འདྲའི་སྡུག་ལ་རྩུབ།། 

ཁྱོད་ཀྱི་ལམ་དུ་རྒྱབ་ནས་སྐྱོར་མ་ཡོད།། 
ཁྱོད་ཀྱི་ལམ་དུ་མདུན་ནས་འཐེན་མཁན་ཡོད།། 
ཁྱོད་ཀྱི་མིག་གཉིས་བཙུམས་ཏེ་སོང་ན་ཡང་།། 
རྐང་པ་རྡོ་ལ་ཐོག་པ་ནམ་ཡང་མེད།། 

བདག་གི་ལམ་དུ་མ་ཤི་གསོན་འདྲེ་མང་།། 
མདུན་ལ་སྤོས་ན་སྲོག་གི་ཉེས་པ་ལྕི།། 
རྒྱབ་ཏུ་མནར་ཚེ་མི་ཁའི་མཆེ་བ་གཙིགས།། 
ལམ་འདིའི་ཕ་རོལ་བརྒལ་བ་བདག་ལ་མེད།། 

ཁྱོད་ཀྱི་ལམ་དུ་རྫུན་དང་ཕྲ་མ་ཡང་།། 
ཡང་དག་ཉིད་ལ་བསྒྱུར་བའི་བྱེད་པོ་ཡོད།། 
བདག་གི་ལམ་དུ་དྲང་བདེན་སྨྲ་བའི་གཏམ།། 
བདེན་པ་ཉིད་དུ་ཐོས་པའི་རྣ་བ་མེད།། 

ཁྱོད་ཀྱི་ལམ་ཀྱི་ཀྱོག་མཚམས་རེ་རེ་ན།། 
ཁྱོད་ལ་བསུ་མ་བྱེད་པའི་སྣེ་ལེན་ཡོད།། 
བདག་གི་ལམ་གྱི་གུག་སོ་རེ་རེ་ན།། 
རྐང་པའི་རུས་པ་གཅོད་པའི་ལྕགས་རྙི་མང་།། 

ཁྱོད་ཀྱི་ལམ་དུ་རྫུན་མའི་ལྷ་ཞིག་ཡོད།། 
ལྷ་ཡི་བྱིན་རླབས་ནང་ཡང་ཁྱོད་ལ་འཇུག ། 
བདག་གི་ལམ་དུ་ངོ་མའི་འདྲེ་ཞིག་ཡོད།། 
འདྲེ་ཡི་གནོད་པ་བཟློག་པའི་ཐབས་མ་མཆིས།། 

བདག་གི་ལམ་འདི་ཁྱོད་ཀྱིས་མི་འདོད་ཅིང་།། 
ཁྱོད་ཀྱི་ལམ་དེ་བདག་ལ་ཅི་སྟེ་འཐོབ།། 
འཇིག་རྟེན་འདི་ཡི་རྐང་ལམ་ཕྲ་མོ་གཉིས།། 
གནའ་ནས་དེ་རིང་བར་དུ་འདི་ལྟར་གནས།།