ཐག་རིང་དུ་འཕུར་བ།

          ཐག་རིང་དུ་འཕུར་བ།

འབའ་སྲས།

ང་ནི་ཐག་རིང་ཞིག་ལ་འཕུར་བར་འདོད།།

ཐག་རིང་ལམ་དེ་ཡངས་ཤིང་རིང་བར་འཐེན།།

འོན་ཀྱང་རྟ་དང་རླངས་འཁོར་བརྟེན་མི་བྱེད།།

རང་གི་གཤོག་པ་གཉིས་ལ་བརྟེན་ཏེ་འཕུར།།

མགྱོགས་འགྲོ་འཕྲུལ་དང་གླང་བོ་ཤིང་རྟ་ཡིས།།

ཐང་རིང་གང་གི་ཡུལ་དུ་བསྐྱེལ་བྱས་ཀྱང་།།

དེ་ནི་གཞན་གྱིས་སྐྱབས་ཏེ་བསླེབས་པ་ལས།།

རང་གིས་འབད་དང་བརྩོན་པའི་རྒྱལ་ཁ་མིན།།

དེའི་ཕྱིར་ཡངས་ཤིང་ཆེ་བའི་འཇིག་རྟེན་འདིའི།།

ཧ་ཅང་དོག་པའི་འཚོ་བ་སྐྱུར་མོ་འདིར།།

ཞེན་ཆགས་ཕྱིར་མིག་ལྟ་བ་ལྡོག་བྱས་ཏེ།།

རང་ཉིད་འཕུར་བར་འདོད་པའི་ཡུལ་དེ་འཚོལ།།

ཡུལ་དེར་དབྱངས་ཅན་ངག་གི་དགྱེས་གླུ་ཐོས།།

གནས་དེར་མཛེས་མ་སྟོང་གི་སྒེག་ཉམས་མཐོང་།།

དེ་ན་སྒྱུ་རྩལ་པ་ཡི་རོལ་རྩལ་མངོན།།

སྔོན་ན་མ་རོལ་ཕུན་ཚོགས་དེ་རུ་མཆིས།།

ཡུལ་དེར་རྒས་པས་འཆི་བ་གསོན་པ་འདྲ།།

བཀྲེས་ཤིང་སྐོམ་པའི་འཚོ་བ་སྟོབས་དང་ལྡན།།

དེ་མིན་མ་ཤི་ན་ཡང་མི་གཟུགས་ཙམ།།

ཤི་ཡང་མི་རོ་བསྲེགས་པའི་ཐལ་བ་འོ།།

༢༧/༠༩/༡༣