དགེ་འདུན་རབ་གསལ་ལགས། ཐུགས་རྗེ་ཆེ།

དགེ་འདུན་རབ་གསལ་ལགས། ཐུགས་རྗེ་ཆེ།

འབའ་སྲས།

མཚན་དང་སྙན་གྲགས་སྔོན་ན་ཐོས་མྱོང་ཡོད།།

མཛད་རྗེས་རླབས་ཆེན་དེ་དག་གོ་མྱོང་ཡོད།།

འོན་ཀྱང་མཇལ་ནས་ཁ་བརྡ་བྱས་པ་མེད།།

དེ་རིང་ལེགས་བཤད་ཐོས་པས་ཤིན་ཏུ་དགའ།།

ཁ་སྔོན་དང་ཐོག་རེ་སྐུལ་ཞུས་པའི་དུས།།

སྙན་ངག་ཕ་ཁྱིམ་ཞེས་པའི་ཚོམས་སྡེ་འདིར།།

གསུང་བཤད་ཅི་ཞིག་གནང་ཡང་ཆོག་གོ་ཞེས།།

ཞུ་དུས་ཡ་ཡ་གསུངས་ལ་ཐུགས་རྗེ་ཆེ།།

སྙན་ངག་མེ་ལོང་བོད་དུ་བསྒྱུར་ཚུལ་དང་།།

དབྱུག་པ་ཅན་གྱི་དུས་རབས་ལོ་ཚིགས་སོགས།།

འོལ་ཚོད་གཏམ་གྱི་རྗེས་སུ་མ་ཞུགས་པར།།

ཞིབ་དཔྱད་དོགས་དཔྱོད་མཛད་ལ་ཐུགས་རྗེ་ཆེ།།

ཤོང་སྟོན་རྡོ་རྗེ་རྒྱལ་མཚན་འགྲོ་མགོན་སོགས།།

རྒྱ་བོད་མཁས་པ་རྣམས་དང་ལོ་ཙཱ་བའི།།

འབྲེལ་ཡོད་བརྩམ་ཆོས་ཅི་ཡོད་གང་དུ་ཡོད།།

མེ་ལོང་གཟུགས་སུ་ཕབ་པར་ཐུགས་རྗེ་ཆེ།།

སྙན་ངག་ཕ་ཁྱིམ་བཙུགས་ནས་ལོ་གསུམ་ཉེ།།

མཁས་པའི་ལེགས་བཤད་ཐོས་པ་དེ་རིང་ཡིན།།

དེ་རིང་འདྲ་བར་ཉི་མ་སུམ་བརྒྱ་ཡང་།། 

མཁས་པའི་གསུང་དང་བསྡོངས་ན་ཨེ་མ་ཧོ།།

མཁས་པར་མཁས་པ་མིན་ན་འབྲེལ་བ་དཀའ།།

མཁས་པས་མཁས་པ་མིན་ན་ཁ་བརྡ་མེད།།

མཁས་པ་ཡིན་ཡང་མཁས་ཚུགས་མེད་པ་ཡི།།

མཁས་པ་ཁྱེད་ལ་སྙིང་ནས་ཐུགས་རྗེ་ཆེ།།

མཁས་པ་འགའ་ཡིས་བླུན་པོའི་གཏམ་མི་གསན།།

བླུན་པོ་མང་བོས་མཁས་པའི་གཏམ་མི་གོ །

མཁས་བླུན་གང་ལ་སྨན་པའི་གཏམ་མཁས་པ།།

ཁྱེད་རང་ཁོ་ན་བརྗོད་ཀྱང་རྫུན་དུ་མིན།།

མིང་དུ་གྲགས་པའི་མཁས་པ་འགའ་རེ་ལ།།

ཤེས་བྱ་ཡོད་ཀྱང་ས་འོག་གསེར་བཞིན་གནས།།

གསེར་གྱི་འོད་སྣང་ས་ཡིས་བཀབ་པ་ན།།

རྡོ་དང་གསེར་ལ་ཁྱད་པར་ཅི་ཞིག་མཆིས།།

དེ་བས་ཁྱེད་ནི་ས་འོག་གསེར་མིན་ལ།།

འོད་སྣང་མེད་པའི་ས་སྟེང་རྡོ་ཡང་མིན།།

མཁས་བླུན་རང་གཞན་གཉིས་ལ་ཕན་པ་ཡི།།

འོད་ཀྱི་ཀོང་བུ་ཞིག་དང་དམིགས་བུ་ལགས།།

ཁྱེད་ཀྱི་སྐུ་ཚེ་ཡུན་རིང་བརྟན་པ་དང་།།

བསམ་པའི་དོན་གང་མ་འབད་ལྷུན་གྱིས་འགྲུབ།།

ལེགས་བཤད་ཆར་ཆུ་ས་ལ་ཕབ་བྱས་ཏེ།།

ས་སྟེང་མཛེས་པའི་མེ་ཏོག་རྒྱས་གྱུར་ཅིག །

༠༨/༠༢/༡༤ཉིན་གདན་ཞུ་སྐུ་མགྲོན་མཁས་པ་དགེ་འདུན་རབ་གསལ་མཆོག་གིས་སྙན་ངག་གི་ཕ་ཁྱིམ་ནང་གསུང་བཤད་བཀའ་དྲིན་ཞུ་མཚོན་དུ།