ནང་མི་རེ་ལ་དགའ་ཕྱོགས་ཐ་དད་རེ།

ནང་མི་རེ་ལ་དགའ་ཕྱོགས་ཐ་དད་རེ།


ཨ་ཕ་བོད་ཀྱི་སྐད་དང་ཡི་གེེར་དགའ།།
ཨ་མ་རྒྱ་གར་ཧིན་རྡིའི་སྐད་ལ་དགའ།།
བུ་ཕྲུག་ནུབ་ཕྱོགས་ཕྱི་རྒྱལ་སྐད་ལ་དགའ།།
ཐ་དད་དགའ་ཕྱོགས་མང་ན་ཉོག་འཛིང་རེད།།

ཨ་ཕ་རོགས་འཐེན་ལ་གཞས་གླུ་ལ་དགའ།།
ཨ་མ་གེ་སར་རྒྱལ་བོའི་སྒྲུང་ལ་དགའ།།
བུ་ཕྲུག་དེང་རབས་གཞས་དང་ཞབས་བྲོར་དགའ།།
ཐ་དད་དགའ་ཕྱོགས་མང་ན་ཁོང་ཁྲོ་རེད།།

ཨ་ཕ་སྙན་ངག་འབྲི་དང་ཀློག་རྒྱུར་དགའ།།
ཨ་མ་རྒྱ་མིའི་གློག་བརྙན་ལྟ་རྒྱུར་དགའ།།
བུ་ཕྲུག་འགྲན་བསྡུར་རྐང་རྩེད་སྤོ་ལོར་དགའ།།
ཐ་དད་དགའ་ཕྱོགས་མང་ན་རྩོད་པ་རེད།།

ཨ་ཕ་ཕག་ཤ་འཐེན་ཐུག་ཉོག་ལ་དགའ།།
ཨ་མ་རྩམ་པ་ཆུར་བ་མར་ལ་དགའ།།
བུ་ཕྲུག་སྣུམ་མེད་སྐྱ་ཟས་རིགས་ལ་དགའ།།
ཐ་དད་དགའ་ཕྱོགས་མང་ན་དཀའ་ངལ་རེད།།

ཨ་ཕ་ཁུག་སིམ་ཁྱིམ་དུ་འདུག་ལ་དགའ།།
ཨ་མ་ཕྱི་ལོག་འཁྱམ་འཁྱམ་འགྲོ་ལ་དགའ།།
བུ་ཕྲུག་གྲོགས་པོའི་ཁྱིམ་དུ་འདུག་ལ་དགའ།།
ཐ་དད་དགའ་ཕྱོགས་མང་ན་བཟའ་འཁོན་རེད།།

ཨ་ཕ་རང་ཉིད་གཅིག་བུ་འདུག་ལ་དགའ།།
ཨ་མ་ནང་ལ་མགྲོན་པོ་མང་ན་དགའ།།
བུ་ཕྲུག་ཚོ་ཡང་རྩེད་རོགས་འབོད་ལ་དགའ།།
ཐ་དད་དགའ་ཕྱོགས་མང་ན་འགྲོ་སོང་རེད།།

ཨ་ཕ་གྲོད་ཁོག་བརྒྱགས་ན་ཉལ་ལ་དགའ།།
ཨ་མ་མཚན་གང་གློག་བརྙན་ལྟ་ལ་དགའ།།
བུ་ཕྲུག་མི་ཉལ་ས་ལྡིང་གནམ་ལྡིང་དགའ།།
ཐ་དད་དགའ་ཕྱོགས་མང་ན་ཞེ་སྡང་རེད།།

ཁ་པར་དིར་སྒྲ་གྲགས་ན་བུ་ཕྲུག་དགའ།།
རྒྱ་སྒོའི་དྲིལ་སྒྲ་གྲགས་ན་ཨ་མ་དགའ།།
གྲགས་འགུལ་ཅི་ཡང་མེད་ན་ཨ་ཕ་དགའ།།
ཐ་ཐད་དགའ་ཕྱོགས་མང་ན་བར་ཆད་རེད།།

ཨ་ཕའི་ངོ་གདོང་ནམ་ཡང་གནག་ལ་དགའ།།
ཨ་མའི་ཁ་ངོ་དུས་རྟག་འཛུམ་ལ་དགའ།།
བུ་ཕྲུག་ཚོ་ནི་སྐད་ཅོར་རྒྱག་ལ་དགའ།།
ཐ་དད་དགའ་ཕྱོགས་མང་ན་སུན་སྣང་རེད།།

ཨ་ཕ་བོད་ཀྱི་ཅ་དངོས་རྙིང་པར་དགའ།།
ཨ་མ་སྤུས་དག་ཅ་ལག་གོང་ཆེར་དགའ།།
བུ་ཕྲུག་དེང་རབས་འཕྲུལ་ཆོས་དག་ལ་དགའ།།
ཐ་དད་དགའ་ཕྱོགས་མང་ན་ཉོག་དྲ་རེད།།

མདོར་ན་ཆེ་བ་འཛམ་གླིང་སྤྱི་ཚོགས་དང་།།
ཆུང་བ་བཟའ་ཚང་ཕ་མ་བུ་ཕྲུག་དབར།།
དགའ་ཕྱོགས་འདོད་ལུགས་སོ་སོར་གྱེས་པ་ན།།
ཆེ་ཆུང་གཉིས་ཀའི་དཀའ་ངལ་བདག་གིས་གླིང་།།