ཕྱི་རྒྱལ་ཡུལ་གྱི་གྲུ་ཁ་ཞིག

རྒྱ་གར་ཡུལ་གྱི་གྲོགས་པོ་ཞིག་ལ།

ཤེས་རབ་དགའ་ཚལ་གསར་འབྱོར་སློབ་གླིང་དུ།།
སྙན་ངག་མེ་ལོང་ཁྲིད་པའི་མགོ་འཇུག་ནས།།
ལྟ་བ་གཅིག་ཏུ་འདྲིས་པའི་གྲོགས་པོ་ཁྱོད།།
རྒྱ་གར་ཡུལ་ནས་སྐུ་ལུས་བདེ་ལེགས་སམ།།

གྱི་ན་བ་ང་ད་ལྟ་ཕྱི་རྒྱལ་ནས།།
ན་མེད་ཚ་མེད་བདེ་ཐང་ཡིན་ན་ཡང་།།
ཀུན་དགའ་དོན་འགྲུབ་འཚོལ་བའི་བྲེལ་བ་ཡིས།།
ཇ་གང་འཐུང་བའི་དུས་ཚོད་ཡོད་མེད་རེད།།

ཆུང་མས་ལྷོད་ལྷོད་བྱས་ནས་རྩོམ་བྲིས་ཟེར།།
གཅེས་ཕྲུག་གསུམ་པོའི་མ་འོངས་མདུན་ལམ་ལ།།
བསམ་ན་ལྷོད་ལྷོད་སྡོད་ཁོམ་ག་ལ་ཡོད།།
ཀུན་དགའ་དོན་འགྲུབ་མ་འཚོལ་རང་འཚོལ་རེད།།

ཚེ་རིང་མཚོ་མོའི་ཕ་མ་གློག་ཀླད་རེད།།
བསྟན་འཛིན་རང་གྲོལ་གྲོགས་པོ་སྤོ་ལོ་རེད།།
བསྟན་འཛིན་འཇམ་དཔལ་སྤུན་ཟླ་ཀྭ་ཀྲོང་རེད།།
བུ་ཕྲུག་གསུམ་གྱི་དགའ་ཕྱོགས་ཐ་དད་རེད།།

དགའ་ཕྱོགས་རེ་ལ་ཅ་དངོས་མི་འདྲ་བ།།
ཨ་ཕ་སྐུ་མཁྱེན་དེ་རིང་ཉོ་རོགས་ཞེས།།
ཞུ་བ་ཡང་ཡང་འཐེན་ན་སྒོར་རྡོག་འགའ།།
སྒོར་ཁུག་ནང་ནས་མི་ལེན་རང་ལེན་རེད།།

འཚོ་བའི་དཀའ་ངལ་བདག་ལ་མ་མཆིས་ཀྱང་།།
སེམས་ཀྱི་དཀའ་ངལ་གཅིག་བརྩེགས་གཉིས་བརྩེགས་རེད།།
གཞུང་ཡིག་ཤོག་ལྷེབ་རེ་རེ་སླེབས་པ་ན།།
རྙོག་དྲ་ཞིག་ནི་ནམ་ཡང་ཡོད་ཡོད་རེད།།

ཕྱི་རྒྱལ་གྲོང་ཁྱེར་ཆེ་ཞིང་མཛེས་ན་ཡང་།།
རྡ་སའི་རི་ངོགས་ཆུང་ཆུང་ཡང་ཡང་དྲན།།
ཕྱི་རྒྱལ་བུ་མའི་གཟུགས་ཀྱིས་བསླུ་བྱེད་ཀྱང་།།
བོད་པའི་གཞོན་ནུ་མ་ཚོ་སེམས་སུ་འབྱར།།

ཁྱིམ་གྱི་གནས་སྟངས་སེམས་ཀྱི་དཀའ་ངལ་ནི།།
ཞིབ་མོར་བྲིས་ན་གེ་སར་སྒྲུང་རིང་རེད།།
བྲིས་ཀྱང་གྲོགས་ཁྱོད་དགོས་པ་མ་མཆིས་པས།།
ད་ནི་ཕ་རེ་སི་འདི་ངོ་སྤྲོད་བྱེད།།

ཕ་རེ་སི་ན་སྐད་གྲགས་ཅན་པོ་བཞི།།
གྲོགས་ཀྱིས་ཉོན་དང་རེ་རེ་བདག་གིས་བཤད།།
དང་པོ་གཉིས་པ་བདག་ལ་མི་མཁོ་མོད།།
གསུམ་པ་བཞི་བ་བདག་ནི་ཤིན་ཏུ་དགའ།།

དང་པོ་ཨེ་ཧྥེའུ་དྲོ་བེར་ལྕགས་རིང་རེད།།
གཉིས་པ་ལུས་ལ་གཏོར་བའི་དྲི་ཞིམ་རེད།།
གསུམ་པ་རྒུམ་འབྲུམ་བསྙལ་བའི་ལོ་ཆང་རེད།།
བཞི་བ་ཧ་ཧ་གཟུགས་མཛེས་བུ་མོ་རེད།།

དང་པོ་གཉིས་པ་ལོ་རྒྱུས་རང་བཞིན་ཅན།།
གསུམ་པ་བཞི་བ་ཉིན་རེ་འཚོ་བ་རེད།།
འཚོ་བ་སྐྱིད་པོ་རོལ་འདོད་གྲོགས་པོ་འགའ།།
ཡོད་ན་ཤོག་དང་ཧ་ལས་ཧང་སངས་རེད།།

ཤང་བཟེ་ལེ་བཟི་སྲིད་འཛིན་ཕོ་བྲང་རེད།།
སྲིད་དོན་པ་ཚོ་ཉིན་རེ་འགྲོ་ས་ཡིན།།
བུ་མོའི་ལང་ཚོ་འཚོལ་བའི་ཕོ་རྒོད་ང་།།
ཐེངས་གཅིག་མ་སོང་གྲོགས་ལ་དགོངས་དག་ཞུ།།

ཤེལ་ནག་རྐྱང་པས་གྲུབ་པའི་བ་གམ་ཅན།།
ཡོ་རོལ་ནང་གི་ཁང་ཆེན་མཐོ་ཤོས་དེ།།
མང་པ་ན་སི་མིང་ཅན་པ་ཚོང་ཁང་ནང་།།
འཁྲུག་སྤྱོད་ཅ་ལག་ཉོས་ན་རིན་གོང་ཆུང་།།

ལ་རྡི་ཧྥང་སིར་འབོད་པའི་ས་གནས་དེར།།
དེང་རབས་ཅན་གྱི་བཟོ་བཀོད་ལེགས་པ་ཡི།།
ཤེལ་གྱི་ཁང་པ་དགུང་ལ་ཟུག་པ་ཡོད།།
དགའ་བོ་ཁྲིད་ནས་འཁྱམ་འཁྱམ་བྱེད་ས་ཡིན།།

སྨད་ཚོང་མང་སའི་སྤོ་ལོང་ནགས་གསེབ་ཅེས།།
སྐད་གྲགས་ཅན་ཞིག་ཕ་རེ་སི་ན་མཆིས།།
རིན་གོང་ཆུང་ཞིང་བུ་མོ་མཛེས་མ་རེག །
ང་ཡང་ཐེངས་གཅིག་སོང་ཡིན་ངོ་རེ་ཚ།།

ལ་ཤེད་ཤ་པེད་འབོད་པའི་ས་གནས་ཤིག །
རྒྱ་གར་ཁ་ཟས་བྲོ་བ་ཆེ་ས་དང་།།
གཞི་ཆགས་བུ་མོ་ཚང་མ་འཛོམས་ས་ཡིན།།
བོད་པ་ནང་ཁུལ་མཐུན་པ་བསྐྱིལ་ས་རེད།།

སྦེ་བེ་ཞེས་པའི་རྒྱ་ནག་ཚོང་ར་ཞིག །
གསར་འབྱོར་ཕོ་རྐྱང་ཚོ་ནི་འགྲོ་ས་ཡིན།།
རྒྱ་ཟས་ཞིམ་ཞིང་རྒྱ་མོ་རྣམ་པ་ཡག །
སྒོར་མོ་ཡོད་ན་སྐྱིད་པོ་གཉིས་འཐོབ་ཡིན།།

བུ་མོ་དགོས་ན་ཁ་པར་ཐེངས་གཅིག་རེད།།
ད་ཤོག་ཟེར་ན་ཡ་ཡ་ལེགས་སོ་ཟེར།།
སྒོར་རྡོག་འགའ་ཡི་འགྲོ་སོང་ཡོད་ན་ཡང་།།
རྗེས་ན་རྙོག་དྲ་མེད་ནོ་ཁེ་སང་རེད།།

ཕོ་གསར་ཕོ་གསར་རྐུབ་ལ་ཞེ་འདང་ཆེ།།
མོ་གསར་མོ་གསར་ནུ་མར་བརྩེ་བ་ཟབ།།
ཕོ་མོ་ལུས་ལ་དབྱེ་བ་མེད་པ་ཡི།།
དབང་བོ་འདོམས་འཇུག་རྣམ་པ་སྣ་ཚོགས་རེད།།

ཐེངས་ཤིག་ང་ཡང་གཞོན་ནུ་མ་ཞིག་འཕྲད།།
གོང་ཚོད་འགྲིག་ནས་ནང་དུ་ཁྲིད་པ་ན།།
བུ་ཞིག་མོ་ལ་བརྫུས་པའི་བཅོས་མ་རེད།།
ཨ་ཙི་ང་ནི་ཤིན་ཏུ་སྐྲག་པར་གྱུར།།

དེ་ནས་བཟུང་སྟེ་ལོག་གཡེམ་སྒོ་མོ་བཀག །
དགེ་བསྙེན་ཞིག་གི་སྡོམ་པ་ལྟ་བུ་ཡིས།།
རང་གི་ཆུང་མ་མ་གཏོགས་གཞན་པ་ལ།།
སྤྱད་པ་མེད་དོ་ཡོད་ན་དཀོན་མཆོག་གསུམ།།

འདི་ལྟར་ཕ་རེ་སི་ཡི་གནས་སྟངས་དང་།།
རང་གི་བྱས་མྱོང་སྲོང་བོར་བརྗོད་པའི་འཕྲིན།།
ཐེངས་གཅིག་བཀླགས་པའི་རྗེས་སུ་བདག་ལ་ཡང་།།
ཁྱོད་ཀྱི་ཕྱོགས་ནས་འཕྲིན་ཞིག་བསྐུར་བར་མཛོད།།

དེ་རིང་སྔ་དྲོ་སྒྲོལ་མ་ཚར་བཅུ་བཀླགས།།
ཕྱི་དྲོ་རྒུམ་འབྲུམ་བཙགས་པའི་ཆང་ཞིག་འཐུང་།།
ཅུང་ཟད་བཟིས་པའི་རྗེས་སུ་འཕྲིན་ཞིག་བྲིས།།
འཕྲིན་ལ་སྙན་ཆ་མེད་ན་ཆང་གི་སྐྱོན།།