བོད་པ་ཚང་མ་ལོངས་ཤོག

དམར་བོའི་མེ་དཔུང་གནམ་སའི་བར་ནས་སྦར།།
གཅེས་པའི་ཚེ་སྲོག་མི་རིགས་དོན་ལ་བསྲེགས།།
རང་བཙན་སྐད་འབོད་འཛམ་གླིང་ཁྱོན་ལ་བསྒྲགས།།
ངེས་དོན་དཔའ་བོ་བཅུ་ལ་མྱ་ངན་ཞུ།།

བཙན་བྱོལ་གཞུང་གི་བཀའ་བློན་སྐུ་ངོ་ཚོས།།
འཆར་གཞི་མིག་མང་བཏབ་ནས་འདུག་རན་མིན།།
མི་མང་མགྲིན་ཚབ་སྤྱི་འཐུས་རྣམ་པ་ཚོས།།
བསྐྱར་ཞིབ་ཚོན་རྩི་བྱུག་ནས་འདུག་རན་མིན།།

ལུང་རྟོགས་མཁྱེན་པ་ཡངས་པའི་བླ་མ་ཚོས།།
དགེ་བའི་མཆོད་རྟེན་བརྩིགས་ནས་འདུག་རན་མིན།།
བཅུ་ཕྲག་གནས་ལ་མཁས་པའི་དགེ་གཤེས་ཚོས།།
ནང་རིག་མེ་ཏོག་བཀྲམས་ནས་འདུག་རན་མིན།།

ཐབས་དང་ཇུས་ལ་མཁས་པའི་ཆབ་སྲིད་པས།།
ལྟ་བ་འཛུབ་མོར་བགྲངས་ནས་འདུག་རན་མིན།།
ཉིན་རེའི་གནས་ཚུལ་བསྒྲགས་པའི་གསར་འགོད་པས།།
མ་རིག་ཐོས་པ་བྲིས་ནས་འདུག་རན་མིན།།

སྤྱི་ཚོགས་ཁུག་མ་སློག་པའིརྩོམ་པ་པོས།།
སྟོན་གྱི་ཉིན་ཐོ་བྲིས་ནས་འདུག་རན་མིན།།
ཚིག་སྦྱོར་ཚུལ་ལ་མཁས་པའི་སྙན་ངག་པས།།
མཛའ་མོར་བརྩེ་འཕྲིན་བྲིས་ནས་འདུག་རན་མིན།།

དགག་བཞག་རྭ་ཅོ་རྣོ་བའི་དཔྱད་བརྗོད་པས།།
རང་ལུགས་བྲག་ལ་བརྡར་ནས་འདུག་རན་མིན།།
སྤྱི་ཚོགས་རྫིང་བུ་དཀྲིགས་པའི་སྒྲུང་རྩོམ་པས།།
རྟོག་སྒྲུང་རིང་མོ་བྲིས་ནས་འདུག་རན་མིན།།

ཚོང་གི་རྒྱ་མཚོ་འགྲིམ་པའི་ཚོང་བ་ཚོས།།
གསེར་རྡུལ་བྱེ་མ་བཙགས་ནས་འདུག་རན་མིན།།
མང་ཚོགས་དཀྱིལ་མས་རང་གི་འཚོ་བ་རུ།།
རྒྱགས་ཕྱེ་རྒུན་འབུ་འཐུས་ནས་འདུག་རན་མིན།།

སྐྲ་ལོ་འདབ་མ་དཀར་པོའི་བགྲེས་པོ་ཡང་།།
ཕྱི་མའི་ལམ་ཁ་འཕྱགས་ནས་འདུག་རན་མིན།།
ལོ་ཆུང་བྱིས་པ་སློབ་གྲྭའི་ར་བ་ནས།།
ཀ་ཁ་དབྱངས་ལ་གྱེར་ནས་འདུག་རན་མིན།།

མཐོ་བ་སྐུ་ངོ་དམའ་བ་གཡོག་པོ་ནས།།
ཤེས་ལྡན་མཁས་པ་ཤེས་མེད་བླུན་པོའི་བར།།
འབྱོར་ལྡན་ཕྱུག་པོ་འབྱོར་མེད་སྤྲང་བོ་ནས།།
ལོ་རྒན་བགྲེས་པོ་ལོ་ཆུང་བྱིས་པའི་བར།།

ཉིན་གཅིག་དུས་གཅིག་དུས་ལ་ཡར་ལ་ལོངས།།
གངས་སེང་དར་ཆ་བསྒྲེངས་ནས་ཡར་ལ་ལོངས།།
དཔའ་བོའི་སྙིང་སྟོབས་དྲན་བཞིན་ཡར་ལ་ལོངས།།
ལོངས་ཤོག་ལོངས་ཤོག་བོད་པ་ཚང་མ་ལོངས།།

སྲོག་གི་རྡོ་རིང་བཞེངས་པའི་དུས་ལ་བབ།།
ཁྲག་གི་མིང་ཡིག་འབྲི་བའི་དུས་ལ་བབ།།
ཤི་ན་ཚང་མ་ཤི་བའི་དུས་ལ་བབ།།
གསོན་ན་ཚང་མ་གསོན་པའི་དུས་ལ་བབ།