བློ་ཡི་གཏེར་ལ་ཕྱག་འཚལ་ལོ།།

          བློ་ཡི་གཏེར་ལ་ཕྱག་འཚལ་ལོ།།

འབའ་སྲས།

རབ་ཡངས་རྒྱ་མཚོ་ཆེན་པོའི་ཀློང་།།

གཡོ་བྱེད་རྐང་བས་དཀྲུགས་པ་ཡིས།།

བྱུང་བའི་ཐོས་འཛིན་མྱོས་བྱེད་པའི།།

དབྱངས་དེ་མྱུར་བར་བདག་ལ་སྩོལ།།

བདག་ནི་གདོང་བཞི་གཉིས་པ་སྟེ།།

རིང་ནས་དགའ་ཞིང་མྱང་བའི་སྒྲ།།

ད་དུང་མངོན་པར་ཆགས་བྱེད་ན།།

མཛེས་པའི་བྱད་གཟུགས་བདག་ལ་སྟོན།།

མཆིས་ཀྱང་མི་མངོན་གནས་པ་ཡི།།

གསང་བ་ཟབ་ཀྱི་གཟུགས་རིས་ནི།།

སྙན་པའི་སྒྲ་ལས་ཁྱོད་སྐུ་བཞིན།།

འཛུམ་གྲོལ་གཏེར་གྱི་དཔུང་སྟོབས་མཛོད།།

དབྱངས་ཀྱི་ངེས་པ་རྫོགས་པའི་རྒྱུད།།

ཕྱག་སོར་པད་མས་དཀྲོལ་བས་ན།།

ཀུན་གྱི་ཐོས་འཛིན་དགའ་བྱེད་པ།།

བདག་ཀྱང་དེ་བཞིན་འགྱུར་བར་གཟིགས།།

ཀུན་ཏུ་རྨོངས་པའི་མུན་པའི་སྨག །

དྲུང་ནས་འབྱིན་པའི་རིག་པའི་སྨན།།

ཉིན་མོར་བྱེད་པའི་དཀྱིལ་འཁོར་ནི།།

པད་མའི་ཚལ་ལྟར་ཉེ་བར་སྩོལ།།

གང་ཞིག་ཆགས་ཐོགས་མེད་པ་ཡི།།

སྨྲ་བྱེད་རོ་འཛིན་དང་བྲལ་ན།།

ངག་གི་འདབ་མ་རུལ་གྱུར་པས།།

ཁྱོད་བཞིན་བདག་ཉིད་འགྱུར་བར་ཤོག །

འཕྱོན་མའི་ཁ་ཡི་བུར་ཆང་གིས།།

བཟི་པའི་བ་ཀུ་ལ་བཞིན་དུ།།

སྙན་ངག་ཆང་གིས་མྱོས་པ་ལས།།

སངས་མེད་ཤི་བ་བདག་གྱུར་ཅིག །

༢༠/༡༡/༡༣ དགོང་མོར།