མཚན་གུང་གི་མཛའ་གཞས།
23/06/2011 22:05དཀར་གསལ་ཟླ་འོད་མཚོ་ལ་བཏབ་པས།།
མེ་ཏོག་ཆུང་ཆུང་འཛུམ་ཁ་ཕྱེས་སོང་།།
ང་དང་ཞེ་མཐུན་གངས་དཀར་སྒྲོལ་མའི།།
སྔོན་གྱི་ལས་འཕྲོ་ད་དུང་ལྷག་ཡོད།།
སེམས་ཀྱི་སྙིང་གཏམ་ཁྱོད་ལ་བཤད་ན།།
གངས་དཀར་སྒྲོལ་མས་མིན་མིན་མ་གསུངས།།
འཇིག་རྟེན་མི་ཡི་ལམ་ཕྲེང་འདི་ནས།།
ངེད་གཉིས་ལས་ཀྱིས་མཇལ་དགོས་བྱུང་སོང་།།
ཁྱོད་ཀྱི་བརྩེ་བའི་མིག་ཆུ་དྭངས་མོ།།
བདག་གི་དམར་ཆུང་སེམས་དང་འདྲེས་ཡོད།།
ང་ཡི་དུང་ཞེན་སེམས་པ་དམར་པོ།།
ཁྱོད་ཀྱི་གཅེས་པའི་སྲོག་ལ་འཐིམ་ཡོད།།
ང་ཡི་མི་ཚེ་ཁྱོད་ལ་ཕུལ་ན།།
རུང་གི་མ་རེད་མ་གསུངས་རོགས་ལོ།།
ཚེ་སྔོན་ལས་ཀྱི་གོ་སྒྲིག་འདི་ལ།།
འགྱུར་བ་གཏོང་བའི་དཔའ་རྩལ་མི་འདུག །
ཤ་ཁྲག་རུས་པའི་ཁོང་ནས་རྡོལ་བའི།།
བདག་གི་རྣམ་ཤེས་ཁྱོད་ལ་འཁྲིས་ཡོད།།
བྲལ་བར་དགོས་པ་སྲོག་ལ་ཐུག་ཀྱང་།།
འབྲལ་ཐབས་མི་འདུག་གངས་དཀར་སྒྲོལ་མ།།
སྙིང་གི་བརྩེ་བ་ཁྱོད་ལ་ཕུལ་ན།།
མི་དགོས་ང་ལ་མ་གསུངས་ཆུང་ལོ།།
བརྩེ་བའི་དྭངས་མ་ཁྲག་ལ་བསྒྱུར་བའི།།
སྲོག་གི་རྩ་བ་ཕུལ་ཡོད་རོགས་ལོ།།
དུང་ཞེན་ཟབ་པའི་ཞོགས་པའི་ཉི་གཞོན།།
རེ་བཞག་སེམས་ངོགས་འདི་ནས་ཤར་སོང་།།
ཉི་མའི་ལང་ཚོ་མ་ནུབ་པར་དུ།།
ཁྱོད་ལ་སྒུག་གོ་གངས་དཀར་སྒྲོལ་མ།།
Tags:
———
Backཞར་བཀོད་ལེ་ཚན།
———
———
འབྲེལ་གཏུག
ངོ་དེབ། ཁ་སྒང་བསམ་གཏན།
གནམ་ཐིག འབའ་སྲས།
ཁ་པར། ༠༠༣༣༧༨༦༤༡༢༤༢༤
>>
———
———
གཞས་ར་ཁྲ་མོ།
སེམས་ཀྱི་རེ་སྨོན།
ངའི་བླ་མའི་དགུང་ལོ་ཇེ་བགྲེས་རེད།།
ང་བླ་མ་དད་པ་ཇེ་ཆེ་རེད།།
ངའི་རྩ་བའི་བླ་མ་ཐུགས་རྗེ་ཅན།།
སྐུ་ཡུན་རིང་བཞུགས་པའི་སྨོན་ལམ་འདེབས།།
ངའི་མ་ལོའི་སྐྲ་ལོ་ཇེ་དཀར་རེད།།
ང་མ་ལོར་དུངས་བ་ཇེ་ཆེ་རེད།།
ངའི་དྲིན་ཆེན་མ་ལོ་བཀའ་དྲིན་ཅན།།
སྐུ་ཡུན་རིང་བཞུ
>>
———