མིག་གིས་འཁྱུད།

             མིག་གིས་འཁྱུད།

འབའ་སྲས།

ལང་ཚོའི་མྱོས་བུམ་དུད་པའི་ཁུར།།

ཆགས་རྒྱས་སྙིང་གི་ལུས་ཕྲ་མ།།

ཤར་ཕྱོགས་དུང་རིའི་ཟླ་བ་བཞིན།།

འཛུམ་དཀར་འོད་ཀྱིས་འཁྱུད་པ་མཐོང་།།

གཟུགས་ཀྱི་ཙན་དན་རྒྱས་པ་རུ།།

ཁྱབ་པའི་དྲི་བཟང་ལྡང་བ་ནི།།

བསིལ་རླུང་རྐང་པའི་འཕེན་རྩལ་གྱིས།།

དྲི་འཛིན་ཀློང་ཆེན་དོག་པར་བྱས།།

རྐང་ཞབས་ས་ལ་དྲུད་པའི་རྡུལ།།

དེ་ཡང་རླུང་གིས་བསྐྱེལ་བ་ན།།

རིང་བའི་ཆགས་ཅན་སྙིང་གི་བུས།།

གསེར་བྱེ་འཛིན་པའི་དཀའ་བ་བརྟེན།།

ཞལ་བཟང་ཟླ་བའི་དཀྱིལ་འཁོར་ནི།།

བརྣག་དཀའི་མུན་པ་སྟུག་པོའི་གཏིང་།།

རྨང་ནས་སེལ་བའི་རེ་བ་རུ།།

ལུས་ཅན་ཀུ་མུད་དག་གིས་ལྟ།།

བྲང་སྐྱེས་རིན་ཆེན་ཤ་རྡོག་ཟུང་།།

དལ་གྱིས་བགྲོད་པས་ལྡེམ་པ་ནི།།

འཇིགས་ཤིང་ཞུམ་པའི་ཁོག་གི་སྙིང་།།

ནུ་མའི་རྟེན་དུ་ལྡིང་བ་འདྲ།།

བིམ་པའི་ཁ་སྒོ་འཛུམ་པའི་ལྟེར།།

ལྕེ་ཡི་ཟེའུ་འབྲུ་དགོད་པ་ནི།།

སྦྲང་མའི་མཆུ་ལ་དོགས་པ་ཡིས།།

སོ་ཡི་འདབ་མ་རྒྱས་པས་བསྲུངས།།

ཟླ་བའི་གདོང་ལ་མཛེས་པའི་སྤྱན།།

ཨུཏྤལ་ནགས་ཀྱི་འདབ་མ་རིངས།།

ས་ཡི་གདུ་བུ་ང་ཡིན་ཞེས།།

མིག་གི་དགྲ་རུ་བསླེབས་པ་བཞིན།།

སྣུམ་པོ་སྐྲ་ཡི་ནགས་ཚལ་ལ།།

རྒྱན་གྱི་མཛེས་བྱེད་འཛིན་པ་ནི།།

ལྷ་ཡི་དགའ་ཚལ་ཁོར་ཡུག་ཏུ།།

གསེར་གྱི་མེ་ཏོག་འཁྲུངས་སམ་སྙམ།།

བདག་གི་མིག་གི་མཁའ་ལ་ནི།།

མིག་ཡངས་ཟླ་བ་འདི་ཤར་བས།།

ཡིད་ཀྱི་མྱ་ངན་སེལ་བའི་སར།།

སྙན་ངག་ཀུན་ད་འདི་བཞད་དོ།།

༡༩/༡༡/༡༣ དགོང་མོར།