ཚོལ་ཡ།
30/05/2013 19:43ཚོལ་ཡ།
འབའ་སྲས།
ཕ་མ་ལྷ་ལས་མཆེད་པའི་འགོ་ཁུངས་དེ་མ་ཚོལ།།
འཇིག་རྟེན་བཀོད་པས་བཟོས་པའི་རྟོག་སྒྲུང་དེ་མ་ཚོལ།།
སྤྲེའུ་བྱང་ཆུབ་སེམས་དཔའི་བརྩེ་དུང་གི་རུམ་ཁ།།
བྲག་སྲིན་མཛའ་མོར་སྦྱར་སའི་བྲག་ཕུག་དེ་ཚོལ་ཡ།།
གནམ་ལས་བྱོན་ཞེས་གནམ་གྱི་ཕོ་བྲང་དེ་མ་ཚོལ།།
བང་སོ་མེད་ཅེས་འཇའ་རིས་རྨུ་ཐག་དེ་མ་ཚོལ།།
ལྷ་འདྲེ་གདོན་གསུམ་མ་ཡིན་གདོང་དམར་བའི་མི་བུ།།
གཉའ་ཁྲི་དུར་སྦས་བྱེད་སའི་བང་སོ་དེ་ཚོལ་ཡ།།
མ་སང་སྤུན་དགུ་ཡོད་པའི་གྲངས་ཀ་དེ་མ་ཚོལ།།
ཡར་ལུང་སོག་ཁ་སྐྱིད་པའི་མཛེས་སྡུག་དེ་མ་ཚོལ།།
སྤུན་དགུ་འཐབ་པས་ཚེ་སྲོག་མདུང་རྩེ་ནས་ཤོར་བའི།།
ཁྲག་རྒྱུན་དམར་པོ་བཞུར་སའི་ཡུར་བ་དེ་ཚོལ་ཡ།།
ཐང་སྟོང་ཟམ་པར་བཞག་པའི་རྐང་རྗེ་དེ་མ་ཚོལ།།
ལྷ་སའི་སྐྱིད་ཆུར་བརྒལ་བའི་ཀོ་གྲུ་དེ་མ་ཚོལ།།
མི་ངོ་ལྷ་ངོར་སྒྲུབ་པའི་གཏམ་རྒྱུད་དེ་རྫོགས་རྗེས།།
བོད་ཁ་གཡག་དྲུག་ཆས་སའི་ལམ་ཁ་དེ་ཚོལ་ཡ།།
སྲོང་བཙན་ལྷ་རྒྱུད་ཡིན་པའི་གདུང་རྒྱུད་དེ་མ་ཚོལ།།
འཛམ་གླིང་དབང་དུ་བསྒྱུར་པའི་ཆེ་བཤད་དེ་མ་ཚོལ།།
རྒྱལ་ཕྲན་དབང་དུ་བསྡུས་པའི་དཀྱིལ་འཁོར་ལ་བཞུགས་རྗེས།།
བཀའ་ལོག་ཞལ་ལྕེ་གཅོད་བྱེད་རལ་གྲི་དེ་ཚོལ་ཡ།།
ཐོན་མིའི་གོང་གི་ཐོན་མི་གཉིས་པ་དེ་མ་ཚོལ།།
ཡི་གེ་མ་དར་སྔོན་གྱི་ཡི་གེ་དེ་མ་ཚོལ།།
འཛུབ་མོ་སོ་ཡིས་བཅད་དེ་སྙུ་གུ་རུ་བྱས་ནས།།
དཀར་མཛེས་ཨ་ཡིག་བྲིས་པའི་ཤོག་བུ་དེ་ཚོལ་ཡ།།
སྙན་ངག་མ་དར་སྙན་ངག་མིང་བྱང་དེ་མ་ཚོོལ།།
ནམ་ཞིག་གང་དུ་གསལ་བའི་དུས་ཚིགས་དེ་མ་ཚོལ།།
བདེ་སྡུག་ཚོར་བས་ཟིན་པའི་སྐད་ཆ་ཡི་དང་པོ།།
དབྱངས་སུ་གྱེར་བའི་སྙན་ངག་ཐོག་མ་དེ་ཚོལ་ཡ།།
༢༩/༠༥/༢༠༡༣
———
Backཞར་བཀོད་ལེ་ཚན།
———
———
འབྲེལ་གཏུག
ངོ་དེབ། ཁ་སྒང་བསམ་གཏན།
གནམ་ཐིག འབའ་སྲས།
ཁ་པར། ༠༠༣༣༧༨༦༤༡༢༤༢༤
>>
———
———
གཞས་ར་ཁྲ་མོ།
སེམས་ཀྱི་རེ་སྨོན།
ངའི་བླ་མའི་དགུང་ལོ་ཇེ་བགྲེས་རེད།།
ང་བླ་མ་དད་པ་ཇེ་ཆེ་རེད།།
ངའི་རྩ་བའི་བླ་མ་ཐུགས་རྗེ་ཅན།།
སྐུ་ཡུན་རིང་བཞུགས་པའི་སྨོན་ལམ་འདེབས།།
ངའི་མ་ལོའི་སྐྲ་ལོ་ཇེ་དཀར་རེད།།
ང་མ་ལོར་དུངས་བ་ཇེ་ཆེ་རེད།།
ངའི་དྲིན་ཆེན་མ་ལོ་བཀའ་དྲིན་ཅན།།
སྐུ་ཡུན་རིང་བཞུ
>>
———