འདི་དྲིས་པ་ཞིག་ཨེ་རེད།

           འདི་འདྲ་ཞིག་ཨེ་རེད།

འབའ་སྲས།

རབ་བྱུང་བ་ཡིས་མཐར་གྱི་བདེ་བ་འཚོལ།།

འཇིག་རྟེན་པ་ཡི་འཁོར་བའི་ལོངས་སྤྱོད་འཚོལ།།

རང་རང་སེམས་ཀྱི་དམིགས་པ་མི་འདྲ་བས།། 

གྲྭ་བ་སྐྱ་བོའི་ལམ་གཉིས་འདི་ནས་བྱུང་།།

སྙན་ངག་པ་ཡིས་འཚོ་བའི་ཟ་ཟུར་འཚོལ།།

ཆབ་སྲིད་པ་ཡིས་གྱ་གྱུའི་སྡིངས་ཆ་འཚོལ།།

དགའ་ཕྱོགས་ནུས་པའི་བློ་སྟོབས་མི་འདྲ་བས།།

མི་ཡི་རིག་གནས་འདི་ནས་སོ་སོར་ཆས།།

ཚོང་བ་དག་གིས་ཁེ་དང་སྒོར་མོ་འཚོལ།།

དབུལ་བོ་རྣམས་ཀྱིས་ཉིན་རེའི་ཁ་ཟས་འཚོལ།།

རྔམ་དང་ཆོག་ཤེས་འཛིན་སྟངས་མི་འདྲ་བས།།

དབུལ་ཕྱུག་མི་ཡི་ཁྱད་པར་འདི་ཡིས་བྱུང་།།

མཁས་པ་རྣམས་ཀྱིས་མུན་སེལ་སྒྲོན་མེ་འཚོལ།།

བླུན་པོ་དག་གིས་ང་འོ་ཉི་འོད་འཚོལ།།

སྦྱངས་དང་མ་སྦྱངས་འབྱོར་བའི་ཡོན་ཏན་ལས།།

མཁས་བླུན་འབོད་པའི་མིང་ཡང་འདི་ལྟར་བྱུང་།།

ཆགས་རྒན་དག་གིས་མཛེས་མའི་ལང་ཚོ་འཚོལ།།

བརྩེ་ལྡན་རྣམས་ཀྱིས་སེམས་ཀྱི་དཀར་ངོགས་འཚོལ།།

སྐབས་དང་མཐའ་ཡི་འཚོལ་སྟངས་མི་འདྲ་བས།།

སྨད་འཚོང་བཟའ་ཚང་ཟེར་བ་འདི་ཡིས་བྱུང་།།

གཡོ་ཅན་ཚོ་ཡིས་མི་ཡི་ངོ་གདོང་འཚོལ།།

དྲང་ལྡན་མི་ཡིས་ཁྲིམས་ཀྱི་རྒྱ་མ་འཚོལ།།

འཁྱོག་དང་དྲང་བོའི་ལམ་ཁ་མི་འདྲ་བས།། 

བཙོན་འཇུག་བཙན་གྲོལ་ལམ་ཁ་འདི་ནས་མཐོང་།།

དྲག་རྒོལ་བ་ཡིས་གནམ་ས་གཉིས་ཀ་གཏོར།།

བྱམས་ལྡན་རྣམས་ཀྱིས་འགྲོ་བ་རིགས་དྲུག་སྐྱོང་།།

བསམ་ཤེས་སྙིང་རྗེ་ཡོད་མེད་ཁྱད་པར་ལས།།

འཇམ་དང་རྩུབ་པའི་རེག་བྱ་འདི་ནས་ཚོར།།

ཆགས་ལྡན་རྒད་པོའི་མིག་ལས་ཆགས་མེ་འབར།།

བརྩེ་ལྡན་བུ་ཡི་སེམས་ལ་བརྩེ་བ་འཁྱིལ།།

སྐབས་དང་མཐར་གྱི་རྐུབ་སྟེགས་མི་འདྲ་བས།།

རྒྱོ་དང་བརྩེ་བ་མི་མཚུངས་འདི་ནས་ཤེས།།

ལ་ལས་ཕ་མ་ཤི་ན་རྡོ་རིང་བཞེངས།།

འགའ་ཡིས་བུ་ཕྲུག་གསོན་ཡང་གསོན་དུར་བྱེད།།

ཕ་མ་བུ་ཡི་འདོད་པ་མི་འདྲ་བས།།

མ་ཤི་གསོན་བྲལ་ཤི་བྲལ་འདི་ལྟར་བྱུང་།།

ཨ་རོགས་མི་བུ་ཡིན་ན་དམིགས་བུ་བྱོས།།

ཨ་ཁ་ལས་ངན་ལས་སུ་མ་འཇུག་རོགས།།

ཨ་མའི་བུ་ཡི་ཤ་ལ་རུས་པ་དགོས།།

ཨ་རོགས་འདི་མོ་བཤད་ན་ཨེ་འགྲིག་གམ།།

༢༨/༠༥/༡༤ ཕྱི་དྲོར།