འདི་ཡང་སྒོར་མོ་འཚོལ་སྟངས་ཤིག

     འདི་ཡང་སྒོར་མོ་འཚོལ་སྟངས་ཤིག

འབའ་སྲས།

ཨ་རི་ཡོ་རོབ་རྒྱ་གར་ཁ་ན་ཏྲ།།

ཕྱི་སྡོད་བོད་མི་གནས་སའི་ཕྱི་རྒྱལ་ན།།

བྱིས་པ་ལོ་རེ་འཕར་བའི་ཟླ་ཚེ་དེ།།

སྒོར་མོ་འཚོལ་སྟངས་ཤིག་གི་རྣམ་པར་གྲུབ།།

སྔོན་དུ་ཟླ་ཁ་གང་ན་ཟླ་འཁོར་དང་།།

ལོ་གཅིག་ཚང་བའི་ལོ་སྐྲ་བཞར་སྟོན་ལས།།

ལོ་རེ་ཚང་ན་སྐྱེས་སྐར་དམིགས་བསལ་བ།།

མང་ཚོགས་དཀྱིལ་མའི་ཁྲོད་ན་ལུགས་དེ་མེད།།

ད་ནི་དུས་རབས་ཉེར་གཅིག་ཁ་ལ་གཡེར།།

མི་རིགས་གཞན་གྱི་འགྲོ་ལུགས་གཙོ་བོར་བཟུང་།།

བྱིས་པའི་སྐྱེས་སྐར་བཙོང་བའི་རྫས་སུ་བྱས།།

ངོ་ཤེས་ཡིན་མིན་ཚང་མ་མགྲོན་དུ་འབོད།།

ཨ་སྒོར་ཡོ་སྒོར་བརྒྱ་ཙམ་འགྲིག་འགྲིག་དང་།།

དེ་ལས་ཉུང་ན་མི་ངོ་མི་ལོན་པས།།

ཟླ་རེའི་ཟླ་ཕོག་ཉུང་བའི་ང་འདྲ་རྣམས།།

སྐྱེས་སྐར་མགྲོན་ཤོག་འབྱོར་ན་དཀའ་ངལ་ཆེ།།

དེ་ཡང་ལོ་གཅིག་ཡིན་ན་ཆོག་པ་ལ།།

ལོ་རེའི་རྗེས་ནས་རྒྱ་ཡང་ཆེ་རུ་འགྲོ །

བུ་གསུམ་ཡོད་ན་ལོ་གཅིག་ཐེངས་མ་གསུམ།།

དེ་འདྲའི་ཁྱིམ་ཚང་གཅིག་དང་གཉིས་ནི་མིན།།

བྱིས་པའི་སྐྱེས་སྐར་གཅིག་པུས་ཆོག་པ་ལ།།

ད་དུང་གཉེན་སྟོན་ཁང་སྟོན་རྣམ་པ་མང་།།

གཉེན་སྟོན་དེ་ཡང་ལོ་རེར་ཐེངས་མ་རེ།།

མདོར་ན་འདི་དག་ཚང་མ་སྒོར་མོའི་དོན།།

ད་དུང་ལེགས་སྐྱེས་ཡོད་ན་ཤོག་ཁྲ་ལས།།

དངོས་པོ་རྩེད་ཆོས་ལ་སོགས་མི་དགོས་པའི།།

ཁ་གསལ་གཏིང་གསལ་མགྲོན་ཤོག་གཏོང་ལུགས་ཀྱང་།།

དར་མགོ་བརྩམས་པའི་སྐད་ཆ་བདེན་པ་ཐོས།།

སྒོར་མོ་འཚོལ་སྟངས་རྣམ་པ་གསར་བ་འདི།།

སྡེ་ཆེན་རྩེད་ར་ཟེར་བའི་སྐད་འཕྲིན་ལས།།

རྒྱལ་ཁབ་གཉིས་ན་སྡོད་པའི་སྐྱེས་པ་གཉིས།།

འཁང་རའི་ཁ་བརྡར་ལྐོག་ཉན་བྱས་ཏེ་བྲིས།།

༢༧/༡༢/༡༣