ཡང་བསྐྱར་ངས་ཁྱེད་ལ་སྙན་ངག་འབྲི།

ཡང་བསྐྱར་ངས་ཁྱེད་ལ་སྙན་ངག་འབྲི།

འབའ་སྲས།

དཀར་གསལ་ཟླ་བ་ཞིག་འཛུམ་སོང་།།

དེ་ནི་ཡིད་འོང་ཁྱོད་མ་རེད།།

མཛེས་པའི་མེ་ཏོག་ཅིག་བཞད་སོང་།།

དེ་ཡང་རོགས་ལོ་ཁྱོད་མ་རེད།།

བདག་གི་སེམས་པ་ཡི་གཡས་ངོར།།

ཉ་གང་ཟླ་བ་ཞིག་ཤར་བྱུང་།།

ཟླ་བའི་དཀྱིལ་འཁོར་ལ་ཅེར་ན།།

ཁྱེད་ཀྱི་ཞལ་རས་དེ་དྲན་ཡོང་།།

གུས་པའི་སྙིང་རྡོག་གི་གཡོན་ན།།

དྲི་ཞིམ་མེ་ཏོག་ཅིག་བཤད་བྱུང་།།

མངར་བའི་དྲི་མ་ཡི་གསེབ་ནས།།

ཁྱེད་ཀྱི་མཛའ་བརྩེ་ལ་རོལ་ཡོད།།

དགུང་གི་ཟླ་བ་དེ་མི་དགོས།།

ས་ཡི་མེ་ཏོག་ཀྱང་མི་མཁོ།།

སེམས་ཀྱི་རྒྱ་མཚོ་ལ་འཛུམ་པའི།།

ཟླ་བ་པདྨ་དེས་ཆོག་ཨང་།།

ཁྱེད་རང་ཕར་ཕར་ལ་མ་ཕེབས།།

ང་ཡང་རིང་རིང་དུ་མི་གྱེས།།

ཁྱོད་དང་ང་རང་གི་གནས་སུ།།

མཛེས་པའི་འཛུམ་མདངས་ཤིག་ལྷག་ཡོད།།

མཛེས་པ་ཚེམས་ཕྲེང་ལ་སྤྲས་ནས།།

ཁ་ཡག་ངོ་དགའ་དེ་མི་དགོས།།

སྙིང་གི་དཀྱིལ་དབུས་སུ་གནས་པའི།།

མཛེས་པའི་མེ་ཏོག་དེ་ཕུལ་རོགས།།

ང་ཡི་ལུས་སྟེང་ན་ཡོད་པ།།

ཤ་ཁྲག་རུས་གསུམ་གྱི་རྟེན་ཡིན།།

གུས་པའི་སེམས་ཁོངས་སུ་འཕྱར་བ།།

བརྩེ་བའི་རྒྱ་མཚོ་ཡི་རླབས་ཡིན།།

མི་ལས་ལུས་རྟེན་གྱི་བདག་པོ།།

ཁྱེད་རང་ཡིན་པ་ཡིས་དགའ་ཡོད།།

ཐང་ཆད་སེམས་པ་ཡི་ནད་ཀྱི །།

སྨན་པ་ཁྱེད་རང་ཡིན་སྤྲོ་ཡོད།།

མཚན་མོའི་གཉིད་དུས་ཀྱི་སྔས་སུ།།

མིག་ཆུས་མཚོ་མོ་ཞིག་བསྐྱིལ་ཡོད།།

མཚོ་སྐྱེས་མེ་ཏོག་ཁྱོད་མིན་ན།།

ཡངས་པའི་རྒྱ་མཚོ་ང་སྐམ་ཆོག །

མཐོན་པོའི་རི་རབ་ཀྱི་རྩེ་ན།།

གསེར་གྱི་ཅོ་ཏོག་ཅིག་བཞེངས་ཡོད།།

གསེར་ལ་འོད་སྣང་ཞིག་ཡོད་ན།།

ནམ་ཡང་བདག་ཕྱོགས་སུ་འཕྲོ་རོགས།།

ལྷ་དར་ལྷ་མཆོག་ལ་འཐེན་ཡོད།།

ལྷ་ལ་རྒྱང་འབོད་ཅིག་བྱས་ཡོད།།

ལྷ་ཁྱོད་བྱིན་རླབས་ཤིག་མཆིས་ན།།

གཡོལ་མེད་བདག་ཉིད་ལ་སྩོལད་ཅིག །

༠༦/༠༣/༠༤ དགོང་མོར།