རྣམ་དབྱེ་གཉིས་པ་དང་བཞི་བ།

         རྣམ་དབྱེ་གཉིས་པ་དང་བཞི་བ།

འབའ་སྲས།

རྣམ་དབྱེ་གཉིས་བཞི་གནའ་ནས་དེ་རིང་བར།།

མཁས་པ་རྣམས་ཀྱིས་རྩོད་པའི་གཞིར་གྱུར་ན།།

བླུན་པོ་ཁྱོད་ཚོས་ཐག་གིས་མི་ཆོད་ཅེས།།

ང་དང་ང་འདྲར་སྡིག་པ་ཤིན་ཏུ་བླུན།།

རི་དྭགས་ལས་ནི་གླ་རྩི་ལེན་པ་བཞིན།།

བླུན་པོའི་སྐད་ཆའི་ནང་དུ་བདེན་པ་བརྙེད།།

དེ་བས་བླུན་པོ་ང་ཡི་གཏམ་ཉོན་དང་།།

རྣམ་དབྱེ་གཉིས་པ་བཞི་བའི་དབྱེ་བ་ཤེས།།

དགོས་པ་ཡོད་ན་དེ་ནི་དགོས་ཆེད་དང་།།

དགོས་པ་མེད་ན་ལས་སུ་བྱ་བ་ཞེས།།

སྤྱི་བཤད་ཙམ་གྱིས་ཐེ་ཚོམ་མི་ཆོད་པས།།

ལ་དོན་ཕྲད་ཡིག་རེ་ལ་ཤིན་ཏུ་སོམས།།

སུ་ར་རུ་དུ་ན་ཏུ་ལ་དོན་ཞེས།།

ལ་ཡིག་ཚབ་ཏུ་ཕྲད་དག་རུང་མོད་ཀྱང་།།

སྐབས་རེར་ལ་ཡིག་ཚབ་ཏུ་མི་འགྲོ་བའི།།

གནད་ཀ་འདི་ནི་ཅིས་ཀྱང་ཤེས་པར་གལ།།

དཔེར་ན་ཁང་བའི་ནང་དུ་ཅ་ལག་སྒྲིག །

དེ་བཞིན་ཁང་བའི་ནང་ལ་ཅ་ལག་སྒྲིག ། 

དུ་དང་ལ་ཡིག་སྦྱར་བའི་ཁྱད་པར་གྱིས།།

རྣམ་དབྱེ་གཉིས་བཞི་སོ་སོར་འབྱེད་པ་ཡིན།།

ཁང་བའི་ནང་དུ་ཅ་ལག་སྒྲིག་པ་ནི།།

བྱ་བ་བྱེད་སའི་གཞི་ཙམ་སྟོན་པ་ལས།།

ཁང་བའི་ཆེད་དུ་བསྒྲིགས་པ་མིན་པས་ན།།

རྣམ་དབྱེ་གཉིས་པ་ལས་ནི་བཞི་བ་མིན།།

ཁང་བའི་ནང་ལ་ཅ་ལག་སྒྲིག་ཅེས་སྐབས།།

ཁང་བའི་ཆེད་དུ་ཅ་ལག་བསྒྲིགས་པ་ལས།།

བྱ་བ་བྱས་པ་གཙོ་བོར་མི་སྟོན་པས།།

རྣམ་དབྱེ་བཞི་བ་ལས་ནི་གཉིས་པ་མིན།།

དེ་བཞིན་རང་གི་ལུས་སུ་ལྭ་བ་གྱོན།།

རང་གི་ལུས་ལ་ལྭ་བ་གྱོན་གཉིས་ནི།།

སུ་དང་ལ་ཡིས་བསྟན་དོན་མི་འདྲ་བས།།

གཉིས་པ་བཞི་བའི་ཁྱད་པར་ཡོད་པ་ཡིན།།

ལུས་སུ་ལྭ་བ་གྱོན་ནོ་ཞེས་པའི་སྐབས།།

གང་ལ་གྱོན་པའི་གཞི་དེ་ངོས་འཛིན་དང་།།

བྱ་བ་བྱེད་ས་གཙོ་བོར་སྟོན་པ་ལས།།

ལུས་ཀྱི་ཆེད་དུ་ལྭ་བ་གྱོན་པ་མིན།།

ལུས་ལ་ལྭ་བ་གྱོན་ཞེས་བརྗོད་པའི་སྐབས།།

ལུས་ཀྱི་ཆེད་དུ་ལྭ་བ་གྱོན་པ་ལས།།

བྱ་བ་བྱས་པ་གཙོ་བོར་མི་སྟོན་པས།།

བཞི་བ་དགོས་ཆེད་ལས་ནི་གཉིས་པ་མིན།།

འོན་ཀྱང་རྒྱན་དུ་གསེར་བརྡུངས་ཞེས་པ་དང་།།

རྒྱན་ལ་གསེར་བརྡུངས་གཉིས་ལ་ཁྱད་པར་མེད།།

རྒྱན་གྱི་ཆེད་དུ་གསེར་ནི་བརྡུངས་པ་སྟེ།།

མ་བརྡུངས་དུས་སུ་རྒྱན་ནི་མེད་པས་ཕྱིར།།

རྒྱབ་དང་ཁང་བ་དེ་དང་མི་འདྲ་སྟེ།།

ལྭ་བ་མ་གྱོན་ཅ་ལག་མ་བསྒྲིགས་ཀྱང་།།

རྒྱབ་དང་ཁང་པ་སྔོན་དུ་ཡོད་པའི་ཕྱིར།།

སུ་དང་ལ་ཡི་ཕྲད་ཀྱི་ཁྱད་པར་ཡོད།།

དེ་དང་དེ་འདྲར་ལྷ་ལ་ཕྱག་འཚལ་དང་།།

འདྲེ་ལ་ཕྱག་འཚལ་རྣམ་དབྱེ་གཉིས་པ་དང་།།ཐབ་ལ་མེ་ཐོངས་ཐབ་ཏུ་མེ་ཐོངས་ནི།།

རིམ་བཞིན་བཞི་བ་གཉིས་པ་ཡིན་པར་ཤེས།།

བརྡ་སྤྲོད་གཞུང་ན་ཁ་གསལ་མེད་པ་དང་།།

མཁས་པ་རྣམས་ཀྱིས་གསལ་བོར་མ་གསུངས་པ།།

རང་གིས་རྣམ་དཔྱོད་ཡངས་པའི་བློ་གྲོས་ཀྱིས།།

གཉིས་པ་བཞི་བའི་ཁྱད་པར་འདི་ཙམ་ཕྱེས།།

༠༧/༠༡/༡༤