སྒོ་འགྲམ་གྱི་གསང་བ།

ལྡེ་མིག་གཅིག་ཆུང་མས་ཁྱེར་སོང་།།

གཞན་པ་དེ་བུ་མོས་ཁྱེར་འདུག །

ཕ་ལོ་ང་ལྡེ་མིག་མེད་པས།།

སྒོ་འགྲམ་ནས་སྒུག་དགོས་བྱུང་སོང་།།

ཆུང་མ་ལ་ཁ་པར་བཏང་ཡང་།།

ཁ་པར་གྱི་མེ་གློག་རྫོགས་འདུག །

བུ་མོ་ལ་བསྒུག་ཀྱང་མ་བསླེབས།།

ཆང་ཁང་ཞིག་མ་བཙལ་ཐབས་མེད།།

སྡོད་ཁྱིམ་གྱི་ཉེ་འགྲམ་ཞིག་ན།།

ཆང་ཁང་ཞིག་ཡོད་པར་ཕྱིན་ནས།།

ཉི་མ་ལ་ངོ་གདོང་གཏད་ནས།།

སྙན་ངག་གི་སྒོ་མོ་བརྡུང་འདོད།།

ཨ་རག་གིས་བཟི་ཁ་བཙན་པས།།

རིག་པ་དེ་རྒྱང་ལ་སྤྱུགས་སོང་།།

སྙན་ངག་དེ་ཕར་ལ་བྲོས་ཀྱང་།།

མཛེས་མ་ཞིག་ཉེ་སར་དུད་སོང་།།

སྒྲ་སྙན་ཞིག་རྒྱབ་ལ་འཁུར་ནས།།

པར་ཆོས་ཞིག་མདུན་ན་སྣར་བའི།།

ཕྱི་གླིང་གི་ཞི་མོ་ཆུང་ཆུང་།།

སྙན་ངག་གི་ལྷ་མོ་ཡིན་ནམ།།

འདིར་སྡོད་ཅེས་ང་ཡིས་མ་བསུས།།

འདུག་ཆོག་ཅེས་ང་ལ་མ་དྲིས།།

གཡས་འགྲམ་གྱི་རྐུབ་སྟེགས་སྟེང་ནས།།

ཟུར་མིག་ཅིག་ང་ལ་འཕངས་སོང་།།

མཛེས་མ་ཡི་ཟུར་མིག་གཅིག་གིས།།

ཉི་མ་ཡི་དྲོད་སྣང་འཕྲོག་སོང་།།

ཞལ་རས་ཀྱི་འཛུམ་མདངས་དེ་ཡིས།།

ཨ་རག་གི་བཟི་ཁ་ཉམས་སོང་།།

ངེད་གཉིས་ལ་གཏམ་གླེང་མེད་ཀྱང་།།

ཕན་ཚུན་ལ་ལྟ་བའི་ཟུར་མིག །

ནང་སེམས་ཀྱི་གསང་བ་གསལ་བས།།

ཉི་མ་ཡང་རྒྱང་ལ་བྲོས་སོང་།།

སྐར་ཚོགས་ཀྱི་རིག་རིག་མིག་གིས།།

སྤྲིན་པ་ཡི་འོག་ནས་ལྟ་བཞིན།།

མི་ཡུལ་ལ་དུངས་པ་སྐྱེས་ནས།།

སྐར་མ་དག་ས་ལ་བབས་བྱུང་།།

ཉི་མ་ཡིས་བརྗོད་པ་ཡིན་ནམ།།

སྐར་མ་ཡིས་བཤད་པ་ཅི་ཤེས།།

ཞོགས་པ་ཡི་སྐྱ་རངས་དཀར་པོས།།

ངེད་གཉིས་ལ་ཁ་དར་བསྒྲོན་སོང་།།

བདེ་མོ་ཅེས་སྐེ་ལ་འཁྱུད་བཞིན།།

ང་དགའ་ཞེས་བྲང་ཁ་བརླན་བཞིན།།

རང་རང་སར་གོམ་པ་སྤོ་དུས།།

ཞེ་འདང་ཞིག་ས་ལ་ཐིམས་སོང་།།

ཁྱ་ཁྱོར་གྱི་ར་བཟིའི་རྐང་པ།།

རང་ཁྱིམ་ལ་ལྷོད་ཀྱིས་སྤོ་དུས།།

བདེ་བདེ་ཀྱི་མལ་ཁྲིའི་སྟེང་ན།།

ཆུང་མ་ཁོང་གཉིལ་ལ་ཡུར་འདུག །