སྙན་ངག་གང་ནས་འབྲི། ཇི་ལྟར་འབྲི།

སྙན་ངག་གང་ནས་འབྲི། ཇི་ལྟར་འབྲི།

འབའ་སྲས།

སྙན་ངག་ཤོག་དཀར་ངོས་ནས་མིན།།

སྙན་ངག་སྙུ་གུའི་རྩེ་ནས་མིན།།

སྙན་ངག་དཔེ་དེབ་ངོ་ན་མེད།།

སྙན་ངག་ཡི་གེའི་ཚོགས་ན་མེད།།

རི་དང་རྒྱ་མཚོ་སྙན་ངག་ཀློང་།།

ཁྱིམ་དང་གྲོང་ཁྱེར་སྙན་ངག་མཛོད།།

ལྗོན་ཤིང་མེ་ཏོག་སྙན་ངག་སྤུན།།

གྲོགས་དང་བཟའ་ཟླ་སྙན་ངག་གཉེན།།

སྙན་ངག་ཆུང་མའི་རུམ་ནས་ཕྲིས།།

སྙན་ངག་ཟ་འཐུང་བར་ནས་ཕྲིས།།

བརྩེ་བའི་མཁའ་རུ་སྙན་ངག་འཁྱུག །

འཚོ་བའི་ཐང་དུ་སྙན་ངག་ཐོར།།

བརྩེ་དུང་སྙན་ངག་འཕྱུར་ཡུལ་དང་།།

འཚོ་བ་སྙན་ངག་འབྱུང་ཁུངས་ཡིན།།

བརྩེ་དུང་མེད་པའི་འཚོ་བ་ནི།།

སྙན་ངག་འགྱུར་ཉམས་མེད་དང་འདྲ།།

སྙན་ངག་དཔོན་པའི་རྐུབ་ན་ཡོད།།

སྙན་ངག་ཕྱུག་པོའི་མཛོད་ན་ཡོད།།

སྙན་ངག་མཛེས་མའི་གཟུགས་ན་ཡོད།།

སྙན་ངག་ཕོ་སར་བྲང་ན་ཡོད།།

དཔོན་ཆེན་རྐུབ་ཀྱི་སྙན་ངག་སྒོར་མོས་ཕྲིས།།

ཕྱུག་པོའི་མཛོད་ཀྱི་སྙན་ངག་ནོར་གྱིས་ཕྲིས།།

མཛེས་མའི་གཟུགས་ཀྱི་སྙན་ངག་མཇེ་ཡིས་ཕྲིས།།

ཕོ་གསར་བྲང་གི་སྙན་ངག་ནུ་མས་ཕྲིས།།

དེང་སང་དཔོན་པོའི་མིང་འདི་སྒོར་གྱིས་ཉོས།།

ཕྱུག་པོའི་རླུང་རྟ་དར་བ་རྫུན་གྱི་དྲིན།།

མཛེས་མ་ང་རྒྱལ་ཆེ་བ་ལང་ཚོས་བཀྱགས།།

ཕོ་གསར་བྲང་ཁ་ཡངས་པའང་ཆགས་པས་བསྐྲུན།།

རྒྱབ་ཁབ་བར་གྱི་སྙན་ངག་སྲིད་ཀྱིས་ཕྲིས།།

རྒྱབ་ཁབ་སྐྱོང་བ་གཙོ་བོ་སྲིད་ལ་ཐུག །

ཕོ་མོ་བར་གྱི་སྙན་ངག་ཆགས་པས་ཕྲིས།།

ཆགས་པ་མེད་པའི་སྐྱེ་བོ་སུ་ཞིག་ཡོད།།

ཕ་མ་རྒས་པའི་སྙན་ངག་དྲིན་གྱིས་ཕྲིས།།

རང་ལ་བྱམས་པ་བསམ་བཞིན་བསམ་བཞིན་ཕྲིས།།

རང་གི་བུ་ཡི་སྙན་ངག་ཤ་ཚས་ཕྲིས།།

ཤ་ཚ་མེད་ན་ཕ་དང་མ་ཡིས་ཅི།།

བགྲེས་པོའི་གདོང་གི་སྙན་ངག་འཛུམ་གྱིས་ཕྲིས།།

མིག་ཟུང་ཉམས་ཀྱང་སེམས་ཀྱི་མིག་གིས་མཐོང་།།

ནད་པའི་ལུས་ཀྱི་སྙན་ངག་རེ་བས་ཕྲིས།།

ལུས་ནི་ཉམས་ཀྱང་སེམས་ན་གསོན་ཤུགས་དར།།

མདོར་ན་གང་སོང་ས་རུ་སྙན་ངག་ཕྲིས།།

མིག་གིས་མཐོང་བ་ཐམས་ཅད་སྙན་ངག་ཡིན།།

གང་དུ་མི་འགྲོ་ཅི་ཡང་མི་འབྲི་བ།།

ཡོན་ཏན་ཡོད་ཀྱང་དོན་གྱིས་སྟོང་བར་ཟད།།

ཇི་ལྟར་དགའ་ན་དེ་ལྟར་སྙན་ངག་ཕྲིས།།

ཤིན་ཏུ་སྐྱོ་བའི་དུས་སུའང་སྙན་ངག་ཕྲིས།།

དགའ་དུས་སྙན་ངག་ཁྱོད་ཀྱི་དགོད་སྒྲ་ཡིན།།

སྐྱོ་དུས་སྙན་ངག་ཁྱོད་ཀྱི་གདུང་དབྱངས་ཡིན།།

མི་ལ་གདུང་དབྱངས་མེད་པའི་སྙན་ངག་ཕྲིས།།

ཕྱུགས་ལ་གོད་ཆག་མེད་པའི་སྙན་ངག་ཕྲིས།།

རྒྱབ་ཁབ་འཁྲུག་རྩོད་མེད་པའི་སྙན་ངག་ཕྲིས།།

མི་རིགས་དབྱེ་འབྱེད་མེད་པའི་སྙན་ངག་ཕྲིས།།

༡༤/༠༦/༢༦ ཉིན་གྱི་ཕྱི་དྲོར།